Ministria për Evropën dhe Punët e Jashtme është vënë në lëvizje nga struktura zyrtare e Partisë Demokratike, në një përpjekje dëshpërimi për t\’i siguruar Sali Berishës mbështetjen diplomatike për të marrë vizën amerikane. Retorika e zjarrtë e përditshme e Sali Berishës kundër \”regjimit\” dhe akuzat e pafundme për lidhje mafioze shemben brenda sekondës kur në lojë futen hallet personale të karriges dhe dëshira e zjarrtë për të fluturuar drejt Shteteve të Bashkuara.
Prapa fasadës së një opozite gjoja të papajtueshme, dyert e institucioneve të qeverisë socialiste kthehen në strehën e fundit të lypjes politike. Rrënjët e kësaj lëvizjeje nisën pasi selia blu trumpetoi me të madhe përfshirjen e kreut të saj në delegacionin e International Democracy Union (IDU) për Konventën Kombëtare Republikane, e cila do të mbahet në Dallas më 9 dhe 10 shtator 2026.
Dokumenti zyrtar i datës 7 gusht u shfaq si e vetmja fije shprese për të krijuar përshtypjen e një zhbllokimi të madh ndërkombëtar, duke iu drejtuar Berishës në cilësinë e liderit të opozitës. Megjithatë, entuziazmi i shfaqur në media u përplas kokë më kokë me muret e ngurta të Departamentit Amerikan të Shtetit.
Një ftesë e thjeshtë nga një organizatë e huaj nuk ka fuqinë juridike të shfuqizojë vendimin e 19 majit 2021, ku Sali Berisha figuron i listuar zyrtarisht si i papërshtatshëm për hyrje në SHBA për korrupsion të rëndësishëm. Përballë kësaj pamundësie për të kaluar kufirin vetëm me letër-ftesa private, u pa qartë se mekanizmat e zakonshëm kishin dështuar.
Kërkesa zyrtare për mbështetje pranë ekzekutivit
Për t\’i dhënë zgjidhje këtij bllokimi procedural, Gazment Bardhi, në cilësinë e kryetarit të Grupit Parlamentar të Partisë Demokratike, i ka drejtuar një shkresë zyrtare dikasterit të jashtëm që drejtohet nga qeveria, duke kërkuar lëshimin e një note verbale shtetërore. Kjo kërkesë dëshmon hipokrizinë më të skajshme të tranzicionit shqiptar.
Udhëheqësi që e kalon kohën duke akuzuar kabinetin e Edi Ramës për shkatërrimin e shtetit ligjor dhe kapjen e çdo zyre publike, pranon pa u skuqur të përdorë pikërisht ato zyra dhe ato struktura qeveritare për të siguruar letrat e kalimit. Berisha sillet dhe trajtohet si një nëpunës i ulët i administratës socialiste, i cili kërkon bekimin diplomatik të ministrisë për të realizuar një udhëtim që në tryezë e shet si triumf të tijin personal.
Pazar i vjetër i fshehur pas spektaklit politik
Ngjarja në fjalë konfirmon se skenari i madh i politikës shqiptare funksionon përmes parimit të kompromiseve të fshehta kur interesat e mbijetesës preken nga afër. Marrëdhënia e gjatë mes dy protagonistëve kryesorë të tranzicionit ka dëshmuar se pavarësisht fjalëve të ashpra për konsum publik, korridoret e pushtetit dhe institucionet shtetërore vihen në shërbim të njëri-tjetrit sa herë që shfaqen emergjenca të këtij niveli.
Fakti që opozita detyrohet t\’i ulet në gjunjë qeverisë për një copë letër diplomatike tregon se përtej teatrove televizive, pazaret e vjetra mbeten e vetmja rrugë e sigurt për mbijetesën e liderëve të paprekshëm.
Comments are closed.