Një laptop i një pasagjeri ka marrë flakë gjatë fluturimit të një avioni të American Airlines nga Atlanta drejt Dallasit, duke shkaktuar alarm në kabinë dhe ndërhyrje të menjëhershme të ekuipazhit.
Ngjarja ndodhi të premten, më 21 gusht, në fluturimin AA2398, i cili po udhëtonte nga Atlanta drejt Dallas-Fort Worth. Në bordin e avionit, një Airbus A321, ndodheshin 133 persona.
Gjatë afrimit për ulje në Dallas, piloti njoftoi kontrollin ajror se ishte raportuar një zjarr në pjesën e pasme të kabinës. Sipas komunikimeve të pilotit me kontrollorët, të siguruara nga CBS News, ekuipazhi po përpiqej ta vinte situatën nën kontroll.
Më pas, piloti bëri të ditur se zjarri ishte shkaktuar nga laptopi i një pasagjeri dhe se pajisja ishte izoluar në pjesën e mesme të kabinës. Ai raportoi gjithashtu se rreth katër ose pesë pasagjerë mund të kishin pësuar djegie.
Ekuipazhi i kabinës arriti ta izolojë pajisjen duke përdorur një çantë të posaçme për izolimin termik të baterive, duke parandaluar përhapjen e zjarrit.
Avioni u ul në mënyrë të sigurt në Dallas-Fort Worth International Airport rreth orës 18:55, ku ekipet emergjente prisnin për të ndërhyrë.
Megjithëse raportimi fillestar nga piloti fliste për 4-5 persona që mund të ishin djegur, informacionet pas uljes tregojnë se një pasagjer mori trajtim mjekësor dhe më pas u lirua në vend.
American Airlines konfirmoi se fluturimi u ul i sigurt pas raportimeve për tym nga pajisja e një pasagjeri dhe vlerësoi reagimin e ekuipazhit për profesionalizmin dhe shpejtësinë në izolimin e pajisjes.
Ndërkohë, Administrata Federale e Aviacionit në SHBA (FAA) ka konfirmuar se bëhej fjalë për një incident me baterinë e laptopit dhe se rasti po hetohet.
Ngjarja rikthen në vëmendje rrezikun që paraqesin bateritë litium-jon në pajisjet elektronike, të cilat në raste të rralla mund të mbinxehen dhe të marrin flakë.
Comments are closed.